Abazović: Nema prekida bojkota bez novih izbora

Premijer Duško Marković ne treba više da zivka opoziciju da prekine bojkot parlamenta, jer ćemo početi da ga ignorišemo, a umjesto toga bi morao što prije da pristane na održavanje novih izbora.

To je u razgovoru za „Dan“ kazao lider Građanskog pokreta URA Dritan Abazović. Ponovio je da bez određivanja datuma novih parlamentarnih izbora u idućoj godini, nema prekida bojkota i povratka opozicije u Skupštinu.

„Stalno pozivanje opozicije da se vrati u parlament govori da premijera Duška Markovića ne možemo držati za riječ. Nekoliko puta je saopštavao da nas više neće zvati, api i pored toga nastavlja sa pozivima. Ovakva situacija postaje sve više komična. Jedini način kojim se možemo boriti protiv toga je, čnni mi se, da prestanemo da odgovaramo Markoviću i da odbijamo njegove pozive, da ga, jednostavno, ignorišemo. Njegovi pozivi su neozbiljni. Ponavljam ono što često govore i svi drugi predstavnici opozicije. Nema nikakvog prekida bojkota Skupštine dok ne dobijemo novi datum parlamentarnih izbora u 2018. godini. To je minimum, ispod kojeg, čini mi se, ne postoji nikakva mogućnost da se o bilo čemu drugom razgovara“, naveo je Abazović.

Kako je istakao, tek nakon eventualnog dogovora o datumu održavanja novih parlamentarnih izbora, moguće je otvoriti i druge teme.

„Tek tada možemo razgovarati o izmjenama izbornog zakonodavstva, pripremama za sprovođenje tih izbora i, naravno, o rješavanju slučaja „državni udar“, koji mora dobiti pravosudni epilog“, naveo je Abazović.