Badnje veče na moru prije 113 godina

„Početkom burne 1908. godine, ja sam putovao „Galicijom“ u pruzi Tesalije i Egejskog mora. Upravo na pravoslavno Badnje veče prošli smo blizu rta Atos, gdje videći osvijetljene one velike Svetogorske manastire, dao sam otvoriti sve električne fenjere, koji bijahu na prvom jarbolu i sa tri topovska hica, te sa nekoliko bengala i vatrometa pozdravio sam Hilandar, zadužbinu Nemanje i Sv. Save, našeg pokrovitelja, a sam Božić sam proslavio u Kavali sa agentom našeg društva, Sponti, i sa nekoliko prijatelja“ – piše u knjizi „Pomorski život na jedrenjacima i parobrodima“ kap. Vlada Ivelića.

Ovu je knjigu, s prvim izdanjem u Splitu 1933, hercegnovska Knjižara So objavila 2009. i 2018. Evo ostalih opisa Božića iz pera jednog od posljednjih Bokelja koji je plovio na jedrenjacima, potom parobrodima…

„Poslije užasnog slučaja, koji sam pretrpio poradi gubitka brika „Pierino“, onako iznemogao i slab iza bolesti, pošao sam u Risan, svoje rodno mjesto, da se malo oporavim i da zadovoljim svojtu, koja me nije davna vidjela. Misliše jadni svi da sam i ja propao, jer su u „Osservatore Triestino“ dva-tri puta čitali da smo svi na brodu pomrli.

„U Boki Kotorskoj, pod onim našim lijepim podnebljem, na čistu zraku, dobro hranjen i njegovan od svojih milih i dragih, ubrzo sam se pokrijepio i ozdravio. Nakon 13 godina odsustva proslavio sam kod kuće božićne praznike, unoseći badnjake i mirbožeći se pri pecivu na ražnju, po starom našem običaju, u slavu Božju sa svojtom, uzvanicama i prijateljima prigodom Sv. Jovana, našeg krsnog imena, da iznova krenem trbuhom za kruhom, dne 22. januara 1883.“

*

„Imao sam nekoliko dobrih prijatelja u onoj našoj koloniji. Išao sam na sve svetkovine, prigodom Božićnih i Uskršnih blagdana i krštenja, k prijateljskim porodicama: Drobnjakovićima, Zenovićima, Živkovićima, Gregovićima, Vučetićima i Perazićima, a kod čestite obitelji Joka Davidovića bio sam stalni gost. Znalo se, osim čestih objeda, morao sam svaki dan kod njih poći na večeru i prenoćiti; jedino bi se zadržavao na brodu kada oluja i rđavo vrijeme ne bi dopustili.“

*

„U aprilu 1904. opet se povratih na zapovijed parobroda „Dafne“, gdje sam plovio u raznim prugama kroz Sredozemno more 9 mjeseci, a januara 1905. počinuo sam kod kuće na dopustu i proslavio Božićne praznike i svoju Krsnu slavu.“

Priredio: Nikola Malović